شقـق فاخرة للإيجار

كيفك يا سامي؟، وكيف شغلك؟، ماشي الحال، الحمدلله..لا يكون أتزوجت وما عزمتني؟ والله يبو فتو جالس بأدور على شقة ماني ملاقي كل الشقق إيجاراتها غالية سواء كانت العمارة جديدة أو قديمة.. أصحابها اللي ما يخافوا الله رافعين إيجاراتها، تخيل يبو فتو (3) غرف وحمام الله يكرمك ومن غير صالة كمان يوصل إيجارها لـ 25000 ألف؟!، ول ول الله يعينك ويساعدك.. طب اسمع نروح ناخد انا وانت لفة على الحي اللي عندنا يمكن نلاقي شقة سعرها طيب.. ركبنا السيارة وجلسنا نلفلف في الحي وجات عيني على عمارة من (4) أدوار، الـ (3) الأدوار الأولى منها قديمة والدور الرابع لسه جديد وهدا حال كل العماير اللي عندنا في الحي (تكتر الفلوس عندهم ويبنوا أدوار ولا يشبعوا ومافي إلا سلخ في عباد الله).. المهم نزلنا من السيارة وكان فيه راجل واقف قدام العمارة سألته بعد ما سلمت عليه أنا وسامي: أنا شايف بعض الشقق ما فيها مكيفات إن شاء الله تكون للإيجار؟.. أيوه للإيجار وأنا صاحب العمارة دي.. طب كويس بكم الشقة ياحبيبنا ؟، اللي في الدور الأول بـ 35000 .. واللي في الدور الرابع بـ 38000 .. ما شاء الله تبارك الله أكيد فيها مسبح وملعب تنس وملعب طايرة وحديقة وشلالات، رد عليا بفزلكة وعنطزة وأزيدك من الشعر بيت بنقدم وجبة فطور مجانية كمان .. حضرتك جالس تتريق، أنا برضو اللي بتريق، انت جالس تقول لي مسبح وملعب تنس ومدري ايش، ايوه ايش اللي كمان خمسة جدران بـ 35 ألف و 38 ألف، انتو ما عندكم رحمة في قلوبكم كيف تبغوا شبابنا وبناتنا يتزوجوا والعنوسة وصلت في البلد لمليون وخمسمية ألف عانس، هو الشاب اللي يبغى يتزوج يلاقيها منكم والا من الرواتب اللي الواحد يستحي انه يتكلم عنها والا يلاقيها من المهور الغالية عند بعض العوايل والا يلاقيها من أصحاب قصور الأفراح والا من حلقة الغنم والا من الأسعار اللي أكلت الأخضر واليابس .. ياملاك العماير يا أصحاب العقارات والمليارات ارحموا الشباب والبنات وساعدوهم انهم يستروا نفسهم وبلاشي من الجشع والطمع اللي عمى بصايركم وقلوبكم، فينكم من كتاب الله سبحانه وتعالى واللي بيقول في كتابه الكريم : ( ويؤثرون على أنفسهِم ولو كان بهِم خصاصة ومن يوق شح نفسه فأولئك هم المفلحون ).. وفينكم من رسولكم الكريم اللي بيقول في الحديث الشريف ( مثل المؤمنين في توادهم وتراحمهم وتعاطفهم مثل الجسد، إذا اشتكى منه عضو تداعى له سائر الجسد بالسهر والحمى ) .. وبيقول كمان صلى الله عليه وسلم: ( من لا يرحم الناس لا يرحمه الله ) .. والا وجودكم في المساجد وبترددوا كلمة ( آمين ) وانتوو جالسين في الصفوف الأولى وبتسمعوا خطيب الجمعة بيقول (اللهم لا تجعل الدنيا أكبر همنا ولا مبلغ علمنا) عشان تسمعوا وبس .. عشان كدا بقول ياوزارة الإسكان، يا صندوق التنمية العقاري عجلوا ووزعوا السكن والقروض للغلابى عشان يرتاحوا من هم وغم الإيجارات ويفتكوا من جشع وطمع أصحاب العماير اللي ما حياخدوا معاهم إلا كفنهم .. وخلي هادي الشقق تسكنها العناكب والدود .. وعيشوا كتيييييير تشوفوا كتيييييير.

abofatoo@hotmail.com